CEBU, Philippines — Ang mga opisyales sa Pilipinas Vismin Super Cup mapasalamaton sa suporta sa lungsod sa Alcantara ubos sa paggangu ni Mayor Fritz Lastimoso, kinsa mipadayag sa ilang kaandam nga mo-host sa unang season sa labing bag-ong propesyonal nga liga sa basketbol sa nasud nga gikatakdang mosikad karong Abril 9 ubos sa istriktong patakaran sa panglawas ug kaluwasan.
Ang Dakbayan sa Sugbo mao unta ang mo-host sa bubble play sa liga, apan tungod sa nagkasaka nga kaso sa Covid-19 sa siyudad, ang mga organizers nangita og alternatibong binyu sa probinsiya ug ang habagatang munisipalidad sa Alcantara midawat sa maong oportunidad sa tumang kahinangop.
"We're very happy that the municipality of Alcantara is very supportive of our league," matud pa ni Super Cup secretary-general coach Chelito Caro. "In fact, they even renovated they gym according to the specifications of the Games and Amusements Board (GAB) and the Inter-Agency Task Force (IATF) in the conduct of a bubble tournament."
Ning bag-o lang, si Caro uban ang mga kadagkoan sa GAB-Central Visayas office mihimo og ocular inspection sa Alcantara ug nakauyon sila sa ilang nakita.
Sa habig sa Alcantara, giisip nilang usa ka dakong garbo ug dungog nga mamahimo silang kabahin sa kasaysayan.
Gumikan sa kadako sa maong kalihukan, si Lastimoso miingon nga makig-coordinate sila sa mga LGUs (local government units) sa Moalboal ug Badian alang sa posibleng tri-hosting sa Super Cup.
"This is tourism and Alcantara will be placed in the map of Cebu and in the Philippines even if it is a fifth class municipality. And this would be an honor and a great experience for my constituents and the rest of the Cebu province," kanayon si Lastimoso.
Aron makabuylo sila sa ilang plano, si Lastimoso nagkanayon nga mangayo sila sa suporta ug tabang ni Cebu Governor Gwen Garcia gumikan kay ang ilang pagbuhaton nahaum man sab sa sports tourism program sa probinsiya taliwala ning pandemiya.