Ginebra 2-0 ang tuyo, TnT laraw makatabla

CEBU, Philippines — Tinguha sa Barangay Ginebra Kings nga moposte og 2-0 nga bentaha, samtang ang TNT Tropang Giga naglaraw nga makatabla sa dihang magtigi sila og usab sa Game-2 sa best-of-seven PBA Philippine Cup finals karong adlawa didto sa AUF Sports Arena sa Angeles City, Pampanga.

Mag-abot ang duha sa alas-6 sa gabii.

Ang Kings maoy mipadanak sa unang dugo apan nanginahanglan pa una sila og dugang singko minutos sa wala pa pildiha ang Tropang Giga, 100-94 sa Game-1 niadtong Domingo.

Duna unta'y tsansa ang Tropang Giga nga modaog sa regulasyon, apan nasipyat ang itsa ni Jayson Castro dayong kapupos sa oras.

Mas bug-at nga tahas ang sagubagon sa Tropang Giga ning higayona gumikan kay ang sinaligan nilang si Bobby Ray Parks wala may klaro kon makaduwa karon gumikan kay dunay gihambin nga injury sa iyang bagtak.

 Gumikan niini, sila si Castro, RR Pogoy, Jay Washington, Por Erram, Troy Rosario ug Simon Enciso kinahanglan nga manglimbasog og maayo aron makab-ot sa TNT ang ilang misyon nga makabawos sa Kings.

Samtang sa habig sa Ginebra, ilang sandigan mao gihapon sila si Japeth Aguilar, Stanley Pringle, Scottie Thompson, LA Tenorio ug Arvin Tolentino aron makuha ang tinguha nilang daog.