CEBU, Philippines — Ang wa'y pilde apan retirado nang Amerikanong boksidor nga si Floyd Mayweather, Jr. mihimo og kasikas taliwala ning pandemiya.
Kini human gipahibawo ni Mayweather pinaagi sa usa ka video post sa iyang Instagram nga moaway siya og balik unya sa Pebrero 28 sunod tuig didto sa Tokyo Dome sa Japan.
Gibansagan ni Mayweather ang umaabot niyang away nga 'Mega 2021'.
"Tokyo, Japan, I'll be back in 2021 and we'll do something great at the Tokyo Dome," suwat pa ni Mayweather sa iyang IG. Wala pa hinuon gibutyag ni Mayweather kon kinsa maoy iyang kontrahon. Si Mayweather miretiro niadtong 2017 bitbit ang perpektong 50-0 record. Human niini, mipakita siya'g aksiyon sa usa ka exhibition match batok ni MMA fighter Tenshin Nasukawa niadtong Disyembre 31, 2018 sa Japan. Taud-taud nang gihisgutan ang rematch nilang Manny Pacquiao, apan nagkahanap kini sa paglabay sa mga panahon ilabi na kay si Mayweather wala mopakita og interes niini.