GM ANTONIO naghari sa CEPCAN Alex Chua Super Blitz 2
CEBU, Philippines — Human mipahiluna sa ikatulo lamang nga dapit sa miaging semana, si Grandmaster Joey Antonio namawi aron dominahon ang Cepcan Alex Chua Super Blitz 2 niadtong weekend.
Si Antonio miiskor og 73 puntos aron labnihon ang titulo sa torneyo nga gipaluyohan nilang US-based Cepcans Engr. Alex Chua ug US candidate master Engr. Josito 'Jojo' Clamor Dondon.
Ang taga Tarlac nga si John Morazo, kanhi player sa Far Eastern University (FEU) sa UAAP maoy nalandig sa ikaduhang dapit bitbit ang 63 puntos ug gisundan nilang NM Rommel Ganzon (57 pts) ug Sherwin Tiu (54 pts) alang sa ikatulo ug ikaupat nga dapit.
Sa laing bahin, si Engr. Archie Ganzon mihimo dayon og kasikas isip bag-ong miyembro sa CEPCA sa dihang naghari kini sa Prexy Jerry Arena alang sa Group B Cepcans ug Ladies uban ang 32 puntos.
Si Michael Ventulan maoy miangkon sa ikaduha nga dapit bitbit ang 25 puntos. Sila si Sheila Khan Sepanton ug Nic Cuizon nga parehong dunay 22 puntos ug si Laila Nadera nga mitali og 19 puntos maoy naglangkob sa top 5 sa maong kompetisyon nga gisuportaan ni CEPCA President Engr. Jerry Maratas.
- Latest
