CEBU, Philippines — Sa usa ka simply apan mahinungdanong paagi, ang Yaw-Yan ArDigma motimaan sa ika-49 nga anibersaryo sa pagkatukod niini karong adlawa, Agosto 22.
Mas espesyal ang ilang adlaw gumikan kay natumong man kini sa adlaw'ng natawhan ni Grandmaster Napoleon 'Nap' A. Fernandez, ang gitamod nga amahan sa Yaw-Yan ug maoy nagmugna ning sikat nga Filipino martial art niadtong 1972.
Apan dili sama sa miaging katuigan diin sila nagselebrar sa ilang anibersaryo sa usa ka sadya ug bibo nga tapok-tapok sa ilang headquarters, si Yaw-Yan ArDigma founder Master Benigno 'Ekin' R. Caniga Jr. nagkanayon nga ilang ihandum ang espesyal nilang adlaw sa ilang kasingkasing uban ang pag-ampo.
"Tungod sa pandemiya karon bawal man ang mga gathering, so among buhaton ang paghandum ug pamisa sa kalag ni GM Nap ug ingon man pasalamat sa another year sa Yaw-Yan ug moabot pang katuigan," matud pa ni Master Ekin.
Si Master Ekin mapasalamaton nga ang Yaw-Yan naabot niining gidugayon bisan pa man sa mga kalisdanan nga ilang naagian ilabi ning panahon sa krisis.
"Nagpasalamat ko nga nakaabot na pud og another year ang Yaw-Yan. Ang sacrifices nako sa akong side pag-propagate sa Yaw-Yan. Sa pag-stand up lang gihapon bisan pa man karon sa pandemic, gipaninguha nako nga naa pa gihapon ang Yaw-Yan Gym nako. Bisan pa man wala na si Grandmaster Nap, ako gihapon ipadayon ang pagtudlo sa Yaw-Yan especially sa mga youngsters nga maduol sila sa sports, " dugang pa niya..
Duna man tuoy mga hagit nga miigo kanila sa paglabay sa panahon, apan si Master Ekin mapasigarbuhon nga ang Yaw-Yan milambo ug nailhan sa tibuok kalibotan isip usa ka Pinoy martial art.
"Akong maestorya mao nga over the years sa akong side, ni-grow ang Yaw-Yan. Nag-sacrifice ko nga ma- propagate sa abroad labi na sa US ug naa pud sa Europe ang Yaw-Yan Ardigma. Nagpasalamat ko sa akong mga estudyante nga naa aning mga dapita kay ilang gidala ang Yaw-Yan sa ilang gym as Filipino martial arts," sumala pa ni Master Ekin.