Blazers mitagak sa Grizzlies: Abante sa playoffs batok Lakers

CEBU, Philippines — Gitagak sa twice-to-beat Portland Trail Blazers ang karibal nga Memphis Grizzlies pinaagi sa pagpilde sa iskor nga126-122 sa ilang NBA play-in kagahapon aron sakmiton ang ikawalo ug katapusang luna sa  Western Conference playoffs.

Sangkaon sa Blazers sa playoffs ang top seed nga Los Angeles Lakers ubos sa pagpangu nilang LeBron James ug Anthony Davis.

Sa labing unang play-in sa liga sukad niadtong 1956, si Damian Lillard mikadlit og 31 puntos ug si Bosnian big man Jusuf Nurkic miamot og 22 puntos ug 21 ka rebounds alang sa Blazers nga madasigon nga mipapha sa otso puntos nilang alkansi sa katapusang kuwarter aron pakgangon ang tinguha sa Grizzlies nga makapuwersa og tagakay nga duwa.

Si Nurkic mibubo og 15 puntos ug 17 ka rebounds sa first half nga nakatabang pagpalabaw sa Blazers og sayes puntos sa halftime, 58-52.

Dako sab og natampo si CJ McCollum nga mitali og 14 sa iyang 29 puntos sa katapusang kuwarter ug ingon man si Carmelo Anthony nga miiskor og 21 alang sa Blazers nga nakasugakod sa gipabutong 35 puntos ni Ja Morant sa Grizzlies, ang nag-unang kandidato alang sa Rookie of the Year.

Ang sentrong si Jonas Valanciunas miposa og 14 sa iyang 22 puntos sa ikaduhang kuwarter alang sa pilderong Grizzlies. Naglabaw pa unta ang Grizzlies og otso puntos sa 9:55 ang oras sa aksiyon, apan ang Blazers milusad og nagkayong rally aron sa pag-abante niini og sayes puntos, 119-113 sa hingpit  sa nahibiling 1:21 sa duwa.

"I was thinking 'I don't want to play again tomorrow.' We had to get this done tonight," matud pa ni  McCollum kabahin sa iyang motibasyon nga pabakwiton ang Grizzlies sa bubble. Nakasikit pa unta ang Grizzlies, 122-123, apan si Anthony milansang og tres sa  nahibiling 21 segundos aron pagsilyo sa kulbahinam nga daog sa Blazers.