Mr. "Atin 'To" Desiderio mapasalamaton ni coach Edsel

CEBU, Philippines — Kon unsa man gani ang iyang nakab-ot ug kon asa na siya karon sa iyang karera, ang Sugboanong basketball star nga si Paul Desiderio miingon nga kabahin niini ang dugay na kaayo niyang magtutudlo nga si coach Edsel Say Vallena.

Mao kini ang gikumpisal ni Desiderio sa dihang mi-guest siya sa ikapitong episode sa Magis Eagles TV niadtong Biyernes sa gabii uban ang kanhi niya teammate sa University of the Philippines (UP) nga si Jun Manzo. "Si coach Edsel, siya akong mentor sa una pa lang from the time nag-start ko og basketball hangtod karon," matud pa ni Desiderio atol sa senemanang sports chat nga ipasalida live pinaagi sa  Facebook page sa Magis Eagles Basketball matag Biyernes sugod sa alas-7:30 sa gabii. Sa dihang nahinabi sa Banat News, si Desiderio mibutyag nga ang pundasyon sa ilang relasyon ni Vallena natukod sa dihang nag-edad pa lamang siya og otso anyos.

"Akong papa (Abner) gi-enroll ko sa basketball training camp ni coach unya wala mi niya pabayra kay project player ko niya sa una," matud pa ni Desiderio nga 23-anyos na karon ug malipayong na-engaged sa dugay na niyang hinigugma nga si Agatha Uvero.

"Coach Edsel guides me every step of the way since I was young. We treat each other like family ug kanunay ko nga mangayo sa iyang opinyon kabahin sa akong duwa."

Ubos sa paggiya ni Vallena, si Desidero nahulma nga usa ka sumulbong nga bitoon sa natad sa basketball.

Si Desiderio unang mihimo og impresyon sa dihang siya maoy gibayaw nga Most Valuable Player  human iyang gigiyahan ang University of the Visayas (UV) Baby Lancers ngadto sa titulo sa  Cebu Schools Athletic Foundation, Inc. (CESAFI) niadtong 2011.

Duha ka tuig ang milabay, si Desiderio misagubang og mas lisud nga hagit, ning higayona sa hawanan sa Diliman isip sakop sa UP Fighting Maroons sa UAAP. Sud sa lima ka tuig, mihimo siya og pangan sa nasudnong unibersidad. Ang dili mahikalimtan niyang gitatak sa handumanan sa komunidad sa UP mao ang linya nga "Atin 'to" nga nahimong simbolo sa kadasig ug determinasyon sa Maroons sa ilang kampanya nga makaangkon og kadungganan sa katapusan niyang UAAP season niadtong 2018. Wa'y duda nga mao kadto ang iyang legasiya. Isip team captain, wala pakyasa ni Desiderio ang UP sa dihang iyang giiskor ang katapusan nilang singko puntos sa 89-87 nilang kadaogan sud sa overtime batok sa Adamson Falcons nga maoy naghatod sa Maroons ngadto sa  labing una nilang pagsud sa kampiyonato sud sa 32 ka tuig.          Pakyas hinuon sila kay gi-sweep sa Ateneo Blue Eagles sa ilang best-of-three title series.

Wala na hinuon masurprisa pa si Vallena sa natagamtaman nga kalampusan ni Desiderio. "Kana si Desiderio mora na kana og anak nako. Sayod ko sa sinugdanan pa lamang nga kining bataa taas og maabot," sumala pa ni kasamtangang coach sa CIT-U Wildcats kabahin ni Desiderio nga sakop sa Blackwater Elite sa PBA. "Sa among panahon sa training sa dihang bata pa siya, ang among camp magsugod sa alas-8 sa buntag, apan mo-text nana siya nako mga alas-6 sa buntag nga ready na siya. Kana siya mosakay luyo sa akong multicab kada adlaw bisan og init kaayo ug iyang jersey mao lamang iyang kober sa iyang lawas gikan sa Liloan padung sa among training venue sa Guadalupe, Cebu City hasta pabalik. Ingon ana siya ka-dedicated." Sa dihang si Desiderio usa na ka establisadong bitoon sa UP, si Vallena mipadayag nga ang iyang tinudloan basketball gihapon maoy gihuna-huna bisan og nagkabayon sa yuta niyang natawhan nga Liloan.

"Ang ubang players kon mauli sa ilang probinsiya, mopahuway ug mag-happy happy, apan kini si Desidero kon mauli sa Cebu, manawag nako ug moingon coach practice ta.

"Isip player, coachable kaayo na siya. Wala seguro'y coach nga makasulti og bati niya kay humble kaayo ug down-to-earth nga natawo. Nagpabilin siya nga tawo nga ako nailhan. Dili siya talented kaayo, apan tungod sa iyang kakugi ug maayong attitude mao na siya milampos sa basketball ug ingon man sa kinabuhi," matud  pa ni Vallena.