CEBU, Philippines — Ang Sugboanang Olympic marathoner nga si Mary Joy Tabal nakasigpat og paagi aron magpabilin siyang malipayon samtang nakigbisog sa mga hagit ning panahon sa kalisdanan.
Walay kalambigitan niini ang paugnat sa kusog.
Sa labing uwahi niyang post sa Facebook, si Tabal mipaambit sa bag-o niyang gikalingawan karon nga mao ang pag-bake og muffins. Ang labing unang Pinay nga nakaapil sa Olympic marathon event niadtong 2016 didto sa Rio de Janiero, Brazil nagkanayon nga gibati siya og tumang kalipay sukad iyang giablihan ang iyang Queen Mary's Kitchen usa ka bulan ang milabay.
"Passion for sports and passion for baking made me feel so accomplished. I know these are just little things, but these little things have given me happiness," matud pa ni Tabal, kanhi five-time National Milo Marathon champion ug gold medalist sa 2017 Southeast (SEA) Games.
Kay wala pa man miabot ang gi-order niyang mga ekipo sa pag-bake, si Tabal nagkanayon nga iya usang gitirahan ang iyang banana muffins nga mapalit sa plain flavor o dunay toppings gikan sa cheese ngadto sa mani ug choco chips.
Matud pa ni Tabal nga wala gyud siya magdahum nga mamahimo siyang produktibo ning panahon sa krisis.
Gibati siya og tumang kalipay kay gawas nga kinaham niya ang pag-bake, duna pa siya kita samtang nalingaw og maayo sa iyang gibuhat.
Nahinuklogan ni Tabal nga taliwala sa pandemiya diin limitado ang aksiyon sa mga tawo, ang matag usa kanato duna gihapoy mahimo nga positibo kon magpursige lang sa kinabuhi ug mopokus sa kaayohan.