Basketbol mikisaw na'g balik sa China

CEBU, Philippines — Human nahunong sud sa lima ka bulan gumikan sa pandemiya, nabalik na ang aksiyon sa Chinese Basketball Association (CBA) niadtong Sabado.

Apan subay sa kamandoan sa ilang kagamhanan alang sa kaayohan ug panglawas sa mga hingtungdan, gipahigayon ang mga duwa nga wa'y nanan-aw kay gidid-an man ang mga fans sud sa binyu.

Ang liga gibahin sa duha ka grupo aron pagseguro sa kaluwasan sa mga players. Ang usa ka grupo gitapok didto sa Qingdao sa amihanang bahin ug ang laing grupo sa habagatang siyudad sa Donngguang.

Sa wala pa sugdi ang mga duwa didto sa Qingdao arena, dunay gigahin nga panahon sa hilom agi'g paghinumdum niadtong mga nangamatay sa coronavirus nga unang milugwa sa ilang nasud sa wala pa mikatap tibuok kalibotan.

Mismo si Yao Ming, ang kanhi NBA star sa Houston Rockets nga mao na karon ang presidente sa CBA, ang mitan-aw sa unang sangka diin ang Zhejiang Guangsha Lions mipukan sa Nanjing Monkey Kings, 112-95.

Human sa duwa, ang duha ka teams parehong mi-bow sa midcourt atubangan sa wa'y tawong binyu. Wala sa'y selebrasyon nga nahitabo.