CEBU, Philippines — Ang PBA mipadangat sa ilang pagyukbo ni San Miguel Corporation Chairman ug CEO Eduardo 'Danding' Cojuangco Jr., usa ka hugot nga tigpaluyo ug haligi sa Philippine basketball nga mipanaw niadtong Martes sa edad nga 85.
Pinaagi sa usa ka kinasingkasing nga post sa Twitter, gipasalamatan sa PBA si Cojuangco gumikan sa dili maihap niining natabang sa liga ug ingon man sa natad sa paugnat sa kusog sa nasud.
"Chairman and CEO of San Miguel Corp., politician, diplomat, businessman, team owner, sports patron...
Thank you for your countless contribution to the PBA and sports!" matud pa sa PBA. Ubos sa administrasyon ni Cojuanco, ang San Miguel Beermen, Ginebra San Miguel ug the Magnolia Hotshots nahimong labing malampuson nga prangkisa sa kasaysayan sa PBA diin sila mikabkab og 53 ka titulo sa kinatibuk-an.
Si Ginebra coach Tim Cone ug UST coach Aldin Ayo nga maoy nagdala kanhi sa La Salle Green Archers diin si Cojuangco maoy numero unong tagasuporta, mipadangat sab sa ilang pagrespeto sa social media.
"A tremendous friend to Philippine basketball. Our prayers for him and the Cojuangco family. The passing of an era," sumala pa ni Cone.
"RIP Boss. Thank You for the Opportunity. Forever Grateful for Your Kindness and Generosity," paambit pa ni Ayo.