CEBU, Philippines — Mobalik na ang boksing sa Las Vegas human giaprubahan sa Nevada State Athletic Commission (NSAC) ang pagbalik sa mga combat sports didto sa ilang dapit.
Ang kadagkoan sa Nevada mitugot sa duha ka boxing cards nga pasiugdahan sa Top Rank ni Bob Arum ug ingon man duha ka Ultimate Fighting Championship (UFC).
Mao kini ang labing unang combat sports events nga mahitabo sa Nevada sukad miulbo ang coronavirus pandemic.
Ang mga mixed martial arts events sa UFC ipahigayon sa ilang pasilidad karong Hunyo 6, samtang ang mga boksing sa Top Rank karong Hunyo 9 ug 11 didto sa MGM Grand, apan dili tugotan ang mga fans nga makatan-aw sa binyu.
Ang wa'y pildeng US featherweight boxer nga si Shakur Stevenson (13-0, 7KOs) makigharong ni Felix Caraballo (13-1-2, 9KOs) sa Puerto Rico sa main event sa June 9 promotion ni Arum.