CEBU, Philippines — Gusto ni Pinoy'ng Olympic middleweight boxing qualifer Eumir Marcial nga adto mopasilong sa poder ni Manny Pacquiao kon ugaling madayon kini nga mag-pro.
Gawas ni Pacquiao, duna pa'y laing duha ka notadong boxing managers ang interesado ni Marcial aron himuon siyang propesyonal. Kini mao sila si Shelly Finkel nga atua magbasi sa New York ug Keith Connolly nga maoy nakig-negosasyon ubos ni promoter Eddie Hearn.
Mismo si Finkel nagsilbeng manager ni Pacquiao sud sa lima ka away, tulo niini batok kang Erik Morales ug tagsa batok nilang Oscar Larios ug Hector Velasquez.
Makadani man tuod ang mga tanyag nga miabot sa mga palad ni Marcial, apan walay kompirmasyon kon pilay kantidad.
Segun sa taho ni Quinito Henson sa The Philippine STAR, igsuong mantalaan sa Banat News, dunay mga huhungihong nga ang usa ka kampo mitanyag ni Marcial og $200,000 (P10 million) nga signing bonus ug $3,500 (P175,000) nga binulan nga allowance sud sa usa ka tuig ug tunga.
Apan matud pa sa usa ka insider sa MP Promotions nga kon si Marcial mopirma og kontrata uban sa usa ka manager, mokaltas kini gikan sa 20 ngadto sa 30 porsiyento sa iyang premyo.
Kon ugaling adto siya mapunta ni Pacquiao, makubra ni Marcial ang tibuok niyang premyo matag away ug ang senador pa gyud ang moabaga sa tanan niyang mga galastuhon.
Mao sab kini ang gibuhat ni Pacquiao ngadto sa mga kababayan niyang sila si Jerwin Ancajas, Johnriel Casimero ug Pedro Taduran nga nangahimong world champions.