Sultan mabayran bisan wala makaaway

CEBU, Philippines — Ang boksidor sa ALA Gym nga si Jonas Sultan makadawat og 10 porsiyento sa gitaganang premyo sa iyang away nga wala mahinayon sa miaging bulan didto sa Johannesburg, South Africa.

Si Sultan gikatakda untang makigsangka ni Ricardo Malajika niadtong Marso  21 didto sa Emperor's Palace sa Kempton Park, apan nakanselar kini gumikan sa pagkuyanap sa coronavirus.

Usa ka adlaw gikan sa ilang pag-abot didto sa Sourth Africa niadtong Marso 14, si Sultan ug ang iyang trainer nga si Edmund Villamor mopauli sa Pilipinas nga walay madawdaw bisan og usa ka sentimo.

Mao kini ang hinungdan nganong si GAB chairman Baham Mitra mipadala og e-mail ngadto ni South African promoter Rodney Berman aron pagpahibawo niini nga kinahanglan Tahuron ang nalatid sa kontrata nga mao ang  paghatag og 10 porsiyento sa premyo ni Sultan.

Mitubag hinuon dayon si Berman diin iyang gipasaligan si Mitra nga iyang tahuron ang kontrata.

Matud pa ni Berman nga nagkasinabot na sila sa ilang ahente nga si Gabriel Elorde nga siya mohatag og $2,000 kon P100,000 isip kompensasyon. Ang $1,000 mapunta ni Sultan, samtang ang laing $1,000 bayad ni Elorde isip matchmaker ug agent.