CEBU, Philippines – Mikulit og laing kasaysayan si San Miguel Beermen superstar June Mar Fajardo human gilangkat ang ikaunom niyang sagunson nga PBA Most Valuable Player award.
Masipang pakpak ug mainiton nga abiba sa mga fans maoy miduyog ni Fajardo samtang gidawat iyang tropeyo isip Season 44 MVP atol sa mabulukong PBA Leo Awards niadtong Domingo didto sa Smart Araneta Coliseum.
"Sana hindi kayo magsawa sakin dito, sana next year ulit," matud pa sa garbo sa lungsod sa Pinamungajan, habagatang bahin sa Sugbo.
"Malungkot na na-injured ako ngayon pero still, thankful pa rin ako kay God sa nangyari. May plano si God para sa akin, kailangan maging positive lagi," dugang pa niya.
Gipasalamatan ni Fajardo ang iyang mga ginikanan nga maoy hinungdan nganong siya nanglimbasog og maayo aron makab-ot ang iyang mga damgo sa kinabuhi.
Sa kinatibuk-an, si Fajardo nakaangkon og 3,140 puntos gikan sa statistical points, media votes, players' votes ug PBA votes aron labnihon ang ikaunom niyang tropeyo isip MVP nga maoy labing daghan sa kasaysayan sa liga. Nagsunod kaniya sila si Ramon Fernandez ug Alvin Patrimonio nga dunay tag-upat ka MVP awards.
Ang 30-anyos nga si Fajardo giduyogan sa Mythical Five nilang Jayson Castro sa TNT, CJ Perez sa Columbian Dyip ug nilang Christian Standhardinger ug Sean Anthony sa NorthPort.
Ang Sugboanong higante naapil sab sa All-Defensive Team uban nilang Anthony, Japeth Aguilar sa Ginebra, Chris Ross sa SMB ug Perez.