CEBU, Philippines — Ang Team SPEAK ug St. Francis mipalagpot sa tagsa-tagsa nila ka mga kontra aron maoy mag-abot sa kampiyonato sa
29 Under category sa 1st Amicis Basketball League (ABL) didto sa Consolacion Sports Complex.
Sila si Jude Manulat ug Kent Aragon parehong mikadlit og 20 puntos sa dihang gilampurnas sa SPEAK ang SK Consolacion, 103-76 aron pagtikang sa finals. Miamot si Joemer Batiquin og 15 puntos alang sa SPEAK nga wala na mopaginhawa pa sa SK Consolacion sukad sila milabaw og 18 puntos nga labaw, 36-18 sa first quarter.
Si Jon Abinales mipabuto og 41 puntos, apan nakawang ang iyang paningkamot kay napilde ang SK Consolacion.
Sa laing aksiyon sa semifinals, si Christian Avila mibahog og 20 puntos sa St. Francis nga mipaluhod sa Cruz Amigos, 69-63 aron lukaton ang katapusang tiket sa finals.
Si Cjay Capin dunay 13 puntos, samtang si Cyril Laurito mitapos uban ang 11 puntos alang sa St. Francis.
Si Nikko Chavez maoy nangu sa Cruz Amigos uban ang 17 puntos, samtang sila si Julieto Casas ug Binux Tizon nagkumboya'g 25 puntos sa pilderong kawsa.
Ang mga duwa sa labing unang ABL season nga gipaluyohan sa North Sports Apparel, VDrink Malunggay Juice,
Fighter 50 Wine ug Consolacion LGU ubos sa liderato ni Mayor Joyjoy Alegado, ubos sa superbisyon ni commissioner Lee Mar Dahil inabagan ni technical committee chief Aurelio Eslawan.