CEBU, Philippines — Wala moduwa si LeBron James, apan nakahimo gihapon ang Los Angeles Lakers paglumos sa Golden State Warriors, 116-86 alang sa ikapito nilang sunod-sunod nga daog sa NBA kagahapon didto sa Chase Center sa San Francisco, California.
Si James tuyo nga wala paduwaa aron ipahuway ang iyang 'groin injury' nga iyang naangkon atol sa ilang duwa batok sa New Orleans Pelicans sa miaging adlaw.
Nangu sa Lakers mao si Anthony Davis nga adunay 23 puntos. Wala na pasudla si Anthony sa fourth quarter.
Ang veteran nga si Rajon Rondo mitampo og 12 puntos ug unom ka assists alang sa Lakers nga mipalig-on sa ilang kupot sa No. 1 spot sa Western Conference sa rekord nga 45-12.
Napun-an ang demalas sa Warriors dihang gipagawas sa korte ug kuyaw masuspenso si Draymond Green human nakigtinubagay sa mga referees kay wala makauyon sa usa ka tawag.
Ang Warriors nakatilaw sa ikawalo nilang sunod-sunod nga pilde.
Didto sa Philadelphia, ang 76ers milubong usab sa New York Knicks, 115-106 bisan og wala ilang superstar tandem nga sila si Joel Embiid ug Ben Simmons.
Nangulo sa Sixers si Tobias Harris nga adunay 34 puntos.
Sa ubang mga duwa, ang Oklahoma City Thunder mipakugang sa Sacramento Kings, 112-108, samtang ang Indiana Pacers mipilde sa Portland Trail Blazers, 106-100.