CEBU, Philippines – Kon si San Miguel Beermen governor Robert Non ang pabut-on, dili niya paduwaon sa tibuok PBA season si JuneMar Fajardo.
Gusto ni Non nga makuha ang siyento porsiyento nga recovery sa ilang sinaligan.
Una nang gikatahon nga dili kaduwa si Fajardo sa Philippine Cup nga buksan sunod bulan. Hangyuon niya ang mga kadagkoan sa SMB nga sa tuig 2021 na kini pabalikon og duwa.
Si Fajardo nakaangkon og bali sa tuong tiil atol sa team practice sa San Miguel sa sayo ning bulana.
Ang 6-foot-10 nga si Fajardo gipaubos sa operasyon ug gikataho nga maglisud paglakaw.
Bisan mahimo na nga iduwa ni Fajardo ang iyang injury human sa duha ka bulan, si Non dili gusto nga irisgo kini ug kinahanglan nga mapalig-on sa Sugboanong sentro pagbalik ang maong bukog nga nabali.
Gawas sa pagseguro sa hingpit nga pagbalik sa kahimsog sa five-time MVP, nanghinaut si Non nga mapakita sa nahibiling sinaligan sa Beermen nga makuha gihapon nila ang kampiyonato nga wala si Fajardo.