MANILA, Philippines – Si Larry Malagar mikadlit og 24 puntos aron pangulohan ang Flores Cousins ngadto sa kulbahinam nga daog batok sa YYBC, 78-74 aron pagpabiling wa'y pilde sa 1st Amicis Basketball League (ABL) season didto sa Consolacion Sports Complex.
Wala sab magpa-alkansi sila si Sakuragi Cayanong, Jasper Macalam ug Andrew Tabares sa dihang ang Flores Cousins ni team owner Atty. Paulo Sucalit mipahugot sa ilang pagkupot sa liderato sa 30-above category bitbit ang 5-0 record.
Si Cayanong mihipos og 17 puntos, si Macalam miiskor og 12 puntos, samtang si Tabares miamot og 10 puntos alang sa Flores Cousins nga milusad og 30-15 rally sa ikatulong kuwarter aron pagposte og 64-52 labaw sa nahibiling 10 minutos sa aksiyon.
Ang mga batos ni coach Patrick Gregory Flores nakasugakod sa hait nga opensa sa YYBC sa hinapos nga bahin sa duwa aron pag-ipsot niini ngadto sa kuwatro puntos nga kadaogan.
Sila si Jareed Maglasang ug Iyong Gicole mitali og 19 puntos, samtang si playing coach KD Cabajes mikolekta og 17 puntos sa 3-3 nga YYBC.
Ang labing unang ABL season nga gipaluyohan sa North Sports Apparel, VDrink Malunggay Juice, Fighter 50 Wine ug Consolacion LGU ubos sa liderato ni mayor Joyjoy Alegado ubos sa superbisyon ni commissioner Lee Mar Dahil inabagan ni technical committee chief Aurelio Eslawan.