CEBU, Philippines — Mikulit sa ilang ikaduhang sunod-sunod nga daog ang Mighty Sports Philippines pinaagi sa pagpukan sa Al Ittihad sa Syria, 77-72 sa Dubai International Basketball tournament kagahapon didto sa Shabab Al Ahli Club sa United Arab Emirates.
Si Andray Blatche nga wala na kuhaa sa Gilas Pilipinas, mipakita nga dili pa siya laos human siya mirehistro og 28 puntos aron pangulohan ang Mighty Sports.
Luya ang opensa sa Mighty sa first period hinungdan nga gibiyaan sila sa mga Syrians, 19-23, apan kalit nabuhi ang ilang dugo ug milusad og 17-0 run.
Ang ex-PBA import nga si Renaldo Balkman miiskor og 15 puntos alang sa Mighty nga nagkinahanglan na lang og usa ka daog aron moabante sa quarterfinals.
Mipakita usab sa ilang katakus ang duha ka sakop sa Gilas pool nga sila si Jamie Malonzo ug PBA No. 1 pick Isaac Go diin mitampo sila og nuybe ug singko puntos.
Sunod sangkaon sa Mighty ang Tunisia unya sa Martes.