'Aki' nadasig sa unang daog

CEBU, Philippines – Human mikulit sa labing una niyang daog sa ONE Championship, ang Sugboanong mixed martial artist nga si Roel 'Akiyama' Rosauro naglantaw dayon sa mas dako pang hagit sa iyang karera sa unahan.

Sayod si Aki, ang sangpit kaniya sa iyang mga higala nga mas dako pang misyon ang iyang sagubangon ug mao kini ang iyang gisilsil sa iyang alimpatakan sa iyang panindahay sa kinabuhi nga kab-uton ang iyang damgo nga mamahimong world champion ugma damlag.

Niadtong Enero 10, ang garbo sa Yaw-Yan ArDigma Cebu miiskor sa una niyang daog sa ONE Championship pinaagi sa unanimous decision batok ni Mulia 'The Ice Man' Legow sa Indonesia sa undercard sa "ONE: A New Tomorrow" didto sa Impact Arena sa Bangkok, Thailand.

Gumikan niini, ang 31-anyos nga si Rosauro mipakgang sa duha niya ka sagunson nga pilde sa ONE Championship, samtang giinat ang iyang MMA record ngadto sa 5-3.

Alang ni Rosauro, ang pagdimdim niya sa katam-is sa kalampusan sa labing dako nga martial arts organization sa kalibotan sa unang higayon daw sama ra nga nakadaog siya og usa ka kampiyonato.

"Sobra ako kalipay mura ko'g nakakuha og belt bisag medal ra," sumala pa ni Rosauro, usa ka featherweight contender nga lumad gikan sa Cantaw-ang Esperanza sa Poro, isla sa Camotes.

Gawas sa iyang daog, si Rosauro nagkanayon nga ang pagkatawo sa ikaduha niyang anak ning bag-o lang nakapadasig gyud kaniya nga doblehon pa ang iyang paningkamot ilabi na kay nangagpas siya sa mas dagkong away sa unahan.

"Doblehon pa nako akoang paningkamot para sa akoang pamilya ilabi na karon nanganak akoang asawa sa ikaduha namong baby," matud ni Rosauro. "Mas lisud pa unya ang akoang training kay gusto ko nga momaayo ko matag  adlaw."

Si Rosauro nga nakabira og silver medal sa Muay Thai event atol sa Philippine National Games (PNG) ug ingon man gold medalist sa Philippine International Jiujitsu Open duha ka tuig na ang milabay, miyukbo ni Yaw-Yan ArDigma Cebu founder Master Benigno 'Ekin' R. Caniga sa dako niining natabang pagbaid sa iyang abilidad sa MMA.

"Naa na sa dugo sa among pamilya ang martial arts," matud pa ni Rosauro. "Pero mapasalamaton kaayo ko og dako ni Master Ekin. Sa una nakong pag-anhi sa Cebu sa dihang nag-edad pa ko og 21 anyos usa ka dekada ang milabay, siya gyud maoy naghulma nako kon unsa nako karon."

"Si Master Ekin maoy naggiya nako samtang gigukod nako akoang damgo. Sama sa ubang atleta, gusto ko nga mamahimong world champion. Lisud siya but angay nga suwayan. Uban ang paningkamot, disiplina ug saktong motibasyon, nanghinaut ko nga  makab-ot nako ang akoang laraw ugma damlag," panapos pa ni Rosauro.