CEBU, Philippines — Pabiling nagpaabot sa ilang P25,000 nga bonus matag usa ang mga atleta sa miaging Southeast Asian Games nga wala kakuha og medalya.
Nasayran nga ang mga atleta nga wala milampos pagsakmit og medalya alang sa nasud gisaaran gihapon sa mga kadagkuan sa Philippine sports og christmas bonus, apan wala kini miabot.
Si Philippine Sports Commission chairman William “Butch” Ramirez miingon nga anaa ang bonus, apan madugay kini tungod sa suliran sa budget.“We have plans, but it remains a plan because of depleted budget after the 30th Southeast Asian Games,” matud ni Ramirez sa The Philippine STAR.
Si Ramirez mirason nga naglisud sa pondo ang PSC human usab miabot sa P400 million ang gibayran sa Philippine SEAG Organizing Committee ngadto sa broadcasting sa mga duwa ug coverage sa tibuok SEA Games.
Nakadawat na hinuon sa ilang mga cash incentives ang mga atleta nga nakakuha og medalya sa miaging SEA Games.