CEBU, Philippines — Usa si Rey Suerte sa mga batan-ong PBA player nga gilauman nga moduwa sa Gilas Pilipinas sa 2023 FIBA World Cup diin usa ang Pilipinas sa mga host.
Human sa ngil-ad nga gipakita sa national team sa miaging 2019 World Cup didto sa China, ang Samahang Basketbol ng Pilipinas seryoso nga makabawi sa 2023.
Nasayran, nga ang PBA mihimo og special Gilas draft sa miaging Rookie Draft diin mikuha ang mga koponan og tagsa-tagsa nila ka mga top prospect aron paduwaon sa Gilas.
Ang Columbian Dyip maoy mipili sa No. 1 nga huwaman sa Gilas nga mao si bigman Isaac Go, samtang si Suerte gibira sa Blackwater Elite isip No. 2
Ang maong mga batan-ong players mopaubos sa Gilas program aron maandam sila inig abot sa World Cup.
Lakip sa mga giisip nga kaugmaon sa Gilas mao sila si Thirdy Ravena, Matt Nieto, Allyn Bulandi, Jaydee Tungcab, Ricci Rivero, Kobe Paras ug 7-foot-2 nga si Kai Sotto.
Sa dili pa ang World Cup, masukod ang abilidad maong mga magduduwa sa pagsalmot sa Gilas sa 2021 FIBA World Cup Asian qualifiers sa Pebrero didto sa Thailand.
Bisan pa og sulod na sa World Cup isip host, gusto sa SBP nga masukod dayon ang katakus sa bag-ong Gilas diin ikasangka nila sa group stage ang Indonesia ug South Korea.