CEBU, Philippines — Gikatahong moapil sa team practice sa San Miguel Beermen si Arwind Santos bisan wala pa gilibkas sa PBA ang silot nga 'indefinite suspension' ngadto kaniya niadtong Nobiyembre sa miaging tuig.
Si Santos uban silang Kelly Nabong ug Arwind Santos gisilotan sa PBA human nalambigit sa rambol diin nag-unay ra sila atol sa team practice sa Beermen. Lakip sa mga naapil ang import nga si Dez Wells, apan gipapauli ra kini ug wala na apila og suspenso.
Nasayran, nga si Santos gikatahon nga pabilo sa maong kagubot dihang gidasmagan niya si Wells atol sa usa ka play sa ilang praktis. Naapil si Nabong tungod kay milaban siya ni Wells, samtang si Tubid misukmag sa import.
Ang mga coaches sa Beermen mikompirmar nga ila na nga paapilon si Santos sa praktis bisan wala pa'y petsa kon kanus-a kini makaduwa.
Mahimo ra kini tungod kay dili na manginlabot ang mga kadagkoan sa liga kon sa praktis ra kini moduwa.
Kon makasalmot na si Santos sa ilang ensayo, lahi ang kaso nila ni Tubid ug Nabong, kinsa pulos adunay expiring contract uban sa Beermen.
Dako ang posibilidad nga adunay usa o duha kanila ang dili na kuhaon sa koponan sunod season.