CEBU, Philippines – Laing Pinoy nga boksidor ang mohagit sa wala pa'y pildeng Japanese champion Naoya Inoue.
Kini human ang International Boxing Federation mimando ni Inoue nga depensaan ang iyang IBF bantamweight title batok sa Pinoy'ng si Michael Dasmarinas (30-2-1, 20KOs).
Kini nagpasabot nga si Inoue kinahanglan nga mohimo og negosasyon sa kampo ni Dasmarinas sud sa 30 ka adlaw.
Kon wala sila'y makab-ot nga kasabotan, hayan nga ipaubos ang ilang title fight sa usa ka purse bidding nga adto mahitabo sa IBF headquarters didto Springfield Township, New Jersey.
Si Inoue (19-0, 16KOs) mao karon ang unified IBF ug WBA bantamweight champion human iyang gipilde ang Fil-Am nga si Nonito Donaire Jr. (40-6, 26KOs) pinaagi sa sikit kaayong desisyon niadtong Nobiyembre didto sa Saitama, Japan.
Sa susamang promosyon, si Nordine Oubaali milampos pagdepensa sa iyang World Boxing Council (WBC) bantamweight title human gibuntog ang kanhi wa'y pildeng si Takuma Inoue nga manghod ni Naoya.
Si Oubaali gimandoan sab karon sa WBC nga manalipod sa iyang korona sunod batok ni Donaire.
Gihatagan sila sa WBC hangtod karong Enero 3, 2020 aron mohimo og kasabotan.