Boxers, grapplers mitampo'g mga bulawan sa Pilipinas

CEBU, Philippines – Natuman ang gisaad sa mga Pinoy boxers ug jiujitsu fighters nga mohatag og mga bulawang medalya sa Pilipinas sa 30th Southeast Asian Games.

Ang Phl boxing team sa pagpangulo ni Eumir Marcial, mikolekta og pito ka gold medals uban ang tulo ka silvers ug duha ka bronzes aron maghari ang boxing event sa SEA Games. 

Napilde nila ang  karibal nga Thailand nga adunay 5-2-2 gold-silver-bronze medal tally.

Isip team captain, si Marcial mihimo sa labing impresibong kadaogan sa finals human niya gipaundang sud sa unang minuto sa first round ang   si Nguyen Manh Cuong sa Vietnam.

Si Marcial nga midaog sa ikatulo niyang bulawan sa SEA Games, inspirado nga misaka sa ring human midaog og bulawan sila si world champion Nesthy Petecio (women's featherweight), Charly Suarez (lightweight), James Palicte (light welterweight), Josie Gabuco (women's lightfly), Rogen Ladon (men's fly) ug Carlo Paalam (men's lightflyweight).

Sa jiujitsu, gipakita sa mga Pinoy nga sila ang hari sa rehiyon human sila mikolekta  og lima ka bulawang medalya kortesiya nilang  Meggie Ochoa, Carlo Pena, Adrian Guggenheim, Annie Ramirez ug Dean Roxas.

Kini ang unang higayon nga giapil sa SEA Games ang jiujitsu.