Didal mikabkab ikaduhang gold

CEBU, Philippines — Mipugnit sa iyang ikaduhang bulawan ang Cebuana skateboarder nga si Margielyn Didal pinaagi sa pagdominar  sa women's street competition sa skateboarding event sa 30th Southeast Asian Games kagahapon didto sa Tagaytay Extreme Sports Complex.

Ang garbo sa Barangay Lahug, mitapos sa iyang labing unang SEA Games appearance bitbit ang duha ka gold medals.

Unang nidaog og bulawan si Didal sa S.K.A.T.E event niadtong Huwebes. 

Sama sa nahitabo sa S.K.A.T.E competition, si Didal ug laing Pinay nga si Christiana Means ang nag-abot sa finals diin  gipilde sa Cebuana ang Fil-American.

 Kagahapon, si Didal mipatigbabaw dihang  gipakita ang tanan niyang abilidad sa lisud nga stunts ug tricks. 

Mirehistro siya sa labing taas nga iskor nga 12.7, samtang si Means adunay 7.3

Ang Indonesian nga si Kyandra Susanto maoy bronze medalist sa iyang 4.0 points.

Sa iyang duha ka bulawan, si Didal dako'g purohan nga makaduwa sa 2020 Olympics didto sa Japan.

Sa laing bahin, ang veteran Cebuana pool player nga si Rubilen Amit milabni sa silver medal sa women's 10-ball event.

Napilde si Amit sa laing Pinay ug teammate nga si Chezka Centeno sa finals, 7-3. 

Laing Cebuana nga si Rinna Babanto midaog sab og silver medal pinaagi sa taekwondo event.

Si Babanto uban iyang partner nga si Dustin Mella maoy miangkon sa silver sa mixed poomsae taekwondo didto sa Ninoy Aquino Stadium.

Miiskor sila og 8.222 sunod sa Malaysian taekwondo artists nga adunay 8.283  alang sa gold medal.