CEBU, Philippines — Upat ka Sugboanon ang mopakita'g aksiyon sa Fight Paradise Kibawe, usa ka mixed martial arts ug kickboxing event karong Disyembre 7 didto sa Kibawi Municipal Gym sa Bukidnon.
Pangulohan kini sa beteranong kickboxer nga si Renan 'Flash' Noblefranca sa Yaw-Yan ArDigma Cebu. Sangkaon niya si Ely Fernandez sa Makati.
"Mao ni ang comeback fight ni Flash ug nag-expect ko nga mapakita gihapon niya ang iyang abilidad isip former champion," matud pa ni Yaw-Yan Ardigma Cebu founder Master Benigno 'Ekin' Caniga Jr. Moaway usab ang laing Yaw-Yan nga si Joseph 'Wolf' Mercado batok ni Jay Tancotian sa Tagum City.
Ang pambato sa JB Dream Fitness Cebu nga si Jestoni Borres makigdumogay usab ni Seto Masangkay sa Bukidnon sa usa ka MMA fight, samtang si Rhyle Lugo makigharong ni Rosauro Sagun.