CEBU, Philippines — Gipalig-on ni Mexican Saul 'Canelo' Alvarez ang iyang legasiya isip usa sa labing maayo nga Mexican boxer human siya nahimong four-division world champion kagahapon didto sa Las Vegas.
Si Alvarez maoy hari sa middleweight ug super middleweight, apan isug siya nga misaka sa light heavyweight division diin iyang gihagit ang Russian champ nga si Sergey Kovalev. Bisan pa og bag-o sa maong timbang, si Alvarez mipakita sa iyang kabangis dihang iyang gipatug si Kovalev sa ika-11 nga round pinaagi sa brutal nga one-two combination sa ulo sa Russian.
Si Alvarez, kinsa maoy undisputed super middleweight champion, mao nay nanag-iya sa WBO light heavyweight title nga usa ka kasaysayan tungod kay usa siya sa maihap nga mga Mehikano nga maghari sa 175 pounds division.
Nasayran nga daghan ang duda sa abilidad ni Alvarez nga mudaog batok ni Kovalev ug nagtuo ang mga fans nga mas maayo pa kung gidawat sa Mehikano ang tanyag nga third fight batok ni Gennady Golovkin kinsa gipilde na ni Alvarez.
Sa maong kadaugan, si Alvarez misaka rekord nga 53-1, 36KOs diin bugtong nakapilde kaniya si Floyd Mayweather Jr. unom ka tuig na ang milabay. Si Kovalev nakatilaw sa iyang ikatulong pilde sud sa 38 ka sangka.