Walay imposible alang ni Cherry

CEBU, Philippines – Walay damgo nga dili matuman kon  paningkamotan sa kinasingkasing nga paagi.

Gipamatud-an kini ni Cherry Mae Celocia nga bisan og bag-o pa lang siya sa competitive running, mipakita dayon sa iyang potensiyal nga molampos sa maong matang sa paugnat sa kusog.

Nagsugod lang pagkahilig sa long-distance running niadtong Marso sa miaging tuig, apan ang 28-anyos nga si Celocia misakmit sa ikasiyam nga dapit sa  10K division sa Cebu leg sa 43rd Milo Marathon niadtong Septiyembre 29 diha sa Cebu City Sports Center.

Sa labing una niyang pagdagan sa Milo Marathon, si Celocia  milabang sa finish line sud sa 52 minutos ug 31 segundos.

"Honestly, wala ko mag-expect nga mosulod sa top 10 sa 10K because daghan kaayo mga elite runners nga miapil and mao sab ni first time nako moapil sa Milo," matud pa ni Celocia, usa sa mga sumusulbong nga fitness instructor sa Sugbo. "Lisud siya kay akong gibalanse akong training, trabaho ug responsibility as a single mother," dugang pa niya.

Matud ni Celocia nga ang numero uno niyang inspirasyon mao ang iyang anak. Gusto niya ipakita nga dili babag ang mga suliran sa kinabuhi ug bisan ang kadaghan sa mga responsibilidad aron mahimo nimo ang imong hilig.

"I believe that nothing is impossible, you must balance your time, know your priorities and most especially we must value our health because health is our real wealth," matud pa ni Celocia, kinsa mitunol sa iyang pasalamat sa iyang trainer ug veteran runner nga si Sherwin Managil.

Dugang ni Celocia  nga padayon siya sa iyang kawsa alang sa himsog nga panglawas ilabi na sa mga inahan ug kababayen-an.

Gawas sa running, plano usab niya ang pagsalmot sa mga trail run ug mga obstacle course race sa sulod ug gawas sa Sugbo.