CEBU, Philippines – Si Emmanuel Villamor mikulit og 25 puntos ug si Randy Colonia midugang og 21 sa dihang ang Marino nakaipsot batok sa Geobert Store, 98-94 aron pagpahayag sa ilang kampanya nga makasud sa semifinals sa open category sa 10th Mayor Alegado Cup Inter-Barangay Fiesta Basketball League didto sa Consolacion.
Sila si Nikko Chavez ug Paulo Dalumpines parehong miiskor og 16 puntos, samtang si John Lloyd Pepito miamot og 10 puntos alang sa Marino nga nagkupot na karon og 3-1 record.
Mipabuto si Rey Gonzaga og 33 puntos ug si Dwight Gonzaga mipupo og 22 puntos, apan naminghoy silang duha gumikan kay ang Geobert Store bokya pa gihapon sa upat ka duwa.
Sa inter-barangay nga aksiyon, si Rovello Robles nga sakop sa Consolacion Sarok Weavers, mikadlit og 31 puntos sa dihang gibuntog sa Pulpogan ang Tayud, 74-70 aron pagtikang ngadto sa usa na lang ka daog aron hingpit nang sakmiton ang kampiyonato sa midgets category A.
Si Prince Arnold Soquiño mikamada og 15 puntos alang sa Pulpogan.
Sa laing bahin, ang Jugan mipukan sa Poblacion Oriental, 86-83 aron pagpahiluna niini sa ikatulong dapit sa maong kategoriya.
Si Vince Luke Daclan maoy nangu sa Jugan uban ang 26 puntos. Giabagan siya nilang Dain Jay Diaz, Dwight Joseph Japus ug John Lester Cañete nga nagkumbinar og 35 puntos.