CEBU, Philippines – Ginganlan ang 10 ka players nga segurado maapil sa Gilas Pilipinas pool nga moduwa sa Southeast Asian Games sa Nobiyembre 30 hangtod sa Disyembre 11 diin ang nasud usa sa mo- host.
Una nang gipahibalo nga sila si PBA stars Christian Standhardinger ug Stanley Pringle ang mangulo sa national team nga modepensa sa ilang trono isip hari sa SEAG basketball event.
Ang Samahang Basketbol ng Pilipinas (SBP) mikompirma nga anaa na sa lista ang mga collegiate standout gikan sa UAAP nga naglakip nila ni Kobe Paras, Ricci Rivero, Isaac Go, Juan Gomez De Liaño, Justine Baltazar ug Dave Ildefonso. Giapil usab ang teen standout nga si Kai Sotto nga mobiya una sa training sa US aron moduwa sa Gilas.
Giklaro sa SBP nga moabot pa sa 15 ngadto sa 20 ka players ilang gidapit alang sa Gilas pool.
Si SBP president Al Panlilio mibutyag nga dili sila mokompiyansa sa SEAG kay sa iyang nakita milambo na sab ang ubang koponan sama sa Thailand, Malaysia ug Singapore.