CEBU, Philippines — Duha ka tadhang Sugboanong lifters ang modala sa bandila sa Pilipinas sa World Weightlifting Championships nga gikatakda karong Septiyembre 18 - 27 didto sa Pattaya, Thailand.
Kini mao sila si Elreen Anne Ando ug John Febuar Ceniza.
Mao kini ang ikaduhang higayon nga si Ando mopakita'g aksiyon sa maong torneyo, samtang labing una alang kang Ceniza.
Si national coach Ramon Solis, kanhi Olympian, nagkanayon nga si Ando mobanat sa women's 64 kgs. division, samtang si Ceniza sa men's 55 kgs. class.
Gawas nilang Ceniza ug Ando, ang Samahang Weightlifting ng Pilipinas nga gipangulohan ni Monico Puentevella mopadala og lain pang walo ka mga atleta sa maong 10 ka adlaw nga kompetisyon, apil na si Rio Olympics silver medallist Hidilyn Diaz ug ang iyang ig-agaw nga si Mary Flor, Elien Rose Perez, Margareth ug Nestor Colonia, Kristnel Macrohon, Dave Lloyd Pacaldo ug Jeffrey Garcia.
Ang mga atleta sa nasud sa World Championships mao sab ang morepresentar sa Pilipinas sa weightlifting event sa 30th Southeast Asian Games duha ka bulan gikan karon didto sa Ninoy Aquino Stadium sa kaulohan.