CEBU, Philippines – Gutom og daog ang Gilas Pilipinas nga mosulong didto sa China ugma alang sa FIBA World Cup nga sugdan karong Sabado.
Si Gilas coach Yeng Guiao nasayod nga daghan ang naglantaw sa koponan nga gamay og tsansa nga molampos sa group stage.
Ang Gilas kinahanglan modaog og duha sa tulo nila ka duwa aron makasud sa second round.
Sugdan sa Gilas ang ilang kampanya karong Agosto 31 diin sangkaon nila ang Italy. Sunod harungon sa Gilas mao ang Serbia sa Septiyembre 2 ug dayon ang Angola sa Septiyembre 4.
Hinuon, si Guiao miingon nga determinado sila nga modaog ug andam ang 12 niya ka players nga moatubang batok sa mga dagko ug tag-as nga mga kaatbang.
Nasayran, nga sa miaging 2014 World Cup, ang Pilipinas nakakuha og usa ka daog batok Senegal. Napilde sila batok sa Croatia ug Argentina.
Ning higayona, si Guiao positibo nga makahimo sila og surprisa sa labing dakong entablado sa basketbol sa kalibotan.
Ang nasudnong koponan mohimo sa katapusan nilang ensayo karong gabii didto sa Meralco Gym.
Ang Gilas nakahiagum og duha ka pilde sa unom nila ka tune-up games didto sa Spain ug batok sa Adelaide 36ers.
Ang komposisyon sa Gilas Pilipinas naglakip nilang Andray Blatche, JuneMar Fajardo, Gabe Norwood, Japeth Aguilar, Troy Rosario ug Paul Lee.
Moduwa uban sa mga beterano mao sila si Keifer Ravena, RR Pogoy, Raymund Almazan, Mark Barroca ug rookies nga sila si CJ Perez ug Robert Bolick mohimo sa labing una nilang World Cup appearance.