CEBU, Philippines — Hingpit na nga gitangtang ni coach Yeng Guiao si Jordan Clarkson nga molangkob sa Final 12 sa Gilas Pilipinas nga moduwa sa FIBA World Cup karong Agosto 31 didto sa China.
Si Guiao nga nangita og paagi aron makaduwa si Clarkson isip local player sa Gilas, miangkon nga gipapas na niya ang maong Fil-Am player tungod kay wala sila makadawat og positibong tubag gikan sa FIBA ug sa NBA.
Si Clarkson nakaduwa sa Gilas sa miaging 2018 Asian Games dihang gitugtan siya sa NBA usa ka semana sa wala pa ang torneyo, apan si Guiao wala na maglaum nga mausab kini tungod kay nasayran niya nga seryoso karon si Clarkson sa ensayo uban sa Cleveland Cavaliers pangandam sa sunod season sa NBA.
Dili usab gusto nga morisgo si Guiao sa pag-usab sa ilang sistema nga dugay na nilang giporma aron mahaom si Clarkson kon ugaling makaduwa man kini sa China.
Sa laing bahin, si Guiao nakapili na og unom ka players nga maglangkob sa Final 12 nga gipangulohan ni JuneMar Fajardo, Andray Blatche, Troy Rosario, Gabe Norwood, Japeth Aguilar ug RR Pogoy.
Ang kompletong line-up sa Gilas masayran karong Domingo human sa duwa sa national team batok sa Adelaide 39ers, usa ka commercial team gikan sa Australia.