CEBU, Philippines – Wala mahutdi sa iyang kadasig si Gilas head coach Yeng Guiao nga ituboy ang Pilipinas sa kadaogan sa FIBA World Cup nga buksan karong Agosto 31 didto sa China.
Si Guiao miisip sa pamahayag ni Duterte nga usa ka dakong hagit alang kanila nga ipakita nga determinado sila nga modaog bisan pa sa kalig-on sa mga koponan nga ilang ikabangga.
Nasayran, nga si Duterte mibuhi og pamahayag nga matud pa gamay kaayo ang tsansa sa Gilas nga modaog ilabi na batok sa Italy nga maoy una nilang ikasangka. Imbes mosimpatiya sa Gilas, ang presidente miawhag hinuon sa mga Pinoy basketball fans nga adto na lang modapig sa China.
Dugang ni Guiao nga dili matag-an ang usa ka duwa sa basketbol ug dako iyang pagsalig sa iyang koponan nga makahimo og surprisa atol sa World Cup.
Human sa Italy, ang Gilas sunod moharong sa Angola sa dili pa ang rank No. 3 nga Serbia sa group stage. Ang Gilas kinahanglan og duha ka daog sa group stage aron moabante sa sunod round.