CEBU, Philippines – Nagtingkagol karon luyo sa rihas sa bilanggoan si kanhi welterweight world boxing champion Carlos Baldomir human kini gisentensiyahan sa usa ka korte didto sa Argentina nga mapriso sud sa 18 ka tuig gumikan sa pagpangabuso niining sekswal sa usa ka bata.
Ang 48-anyos nga si Baldomir nga naghari isip World Boxing Council welterweight champion sud sa 10 ka bulan niadtong 2006, gisikop niadtong 2016 gumikan sa mga alegasyon nga gipasipad-an niini ang pagkababaye sa usa ka bata sud sa duha ka tuig nga nagsugod sa dihang siyete anyos pa ang biktima niadtong 2012.
Nakonbikto siya sa salaod nga "repeated sexual abuse" sa usa ka menor de edad.
Niadtong Enero 2006, gitay-og ni Baldomir ang kalibotan sa boksing human iyang gipilde si unified welterweight champion Zab Judah.
Human sa malampuson niyang pagdepensa sa iyang korona sa WBC batok ni anhing Arturo Gatti, si Baldomir gilangkatan sa iyang titulo ni Floyd Mayweather Jr. atol sa ilang unification bout niadtong Nobiyembre 2006.
Miretiro siya niadtong 2014 bitbit ang 49-16-6 win-loss-draw record uban ang 15KOs.