CEBU, Philippines — Mirepresentar ang import sa San Miguel Beermen ug kanhi NBA standout nga si Chris McCullough nga sunod naturalized player sa Gilas Pilipinas.
Ang 6-foot-8 nga si McCullough miingon nga dakong garbo niya nga moduwa sa Pilipinas isip usa ka naturalized player ug ganahan siya sa nasud human sa iyang mubo nga panahon sa iyang pagduwa sa PBA.
"I am open to be naturalized player for Gilas," matud pa ni McCullough sa iyang social media account.
Ang coaching staff sa Beermen nagtuo usab nga haom si McCullough sa national team tungod kay gawas sa iyang abilidad, batan-on pa usab kini sa pangedaron nga 24-anyos.
Nasayran, nga ang kasamtangang naturalized player sa Gilas nga si Andray Blatche nagpangedaron na og 32-anyos ug posibleng ilisan na kini.
Si McCullough dili ang unang import nga mipadayag sa ilang interes nga motabang sa nasud tungod kay una na nga gidungog nga himuong naturalized cager si Justin Brownlee, ang import sa Barangay Ginebra.