TNT Katropa mosilhig sa Barangay Ginebra
CEBU, Philippines — Usa ka 'sweep' ang laraw sa TNT KaTropa ngadto sa Barangay Ginebra Kings sa Game-3 sa ilang "best-of-five" PBA Commissioner's Cup semifinals series karong gabii didto sa Mall of Asia.
Ang TNT may kahigayonan nga mopahamtang sa defending champion Ginebra og makauuwaw nga kapildihan sa ilang serye kon mausab ang dominante nilang kadaogan sa Game-2 niadtong Domingo sa iskor nga 88-71.
Sa miaging duwa, nakita ang kaagresibo sa KaTropa sa opensa diin nagsalimuang ang Ginebra sa depensa kay nangigo ang mga shooters sa TNT sama nila ni Troy Rosario, Jayson Castro ug Cebuano RR Pogoy.
Pabilin usab nga solido ang gipakita ni import Terrence Jones Jr. sa maong serye.
Hinuon, ang Ginebra walay plano nga ihatag og sayon sa TNT ang finals slot ug kursonada si import Justin Brownlee nga buhaton ang tanan aron mahatod iyang koponan sa kadaogan.
"Just having that never-say-die type of attitude," matud pa ni Brownlee sa PBA.com.
Si Brownlee nagkinahanglan hinuon og suporta gikan sa mga lokal sa Ginebra tungod kay nakita nga dili niya kaya nga siya ra ang mokumbati sa opensa.
Atngan usab kon makabawi ba karong gabii ang Fil-American nga si Stanley Pringle, kinsa mihimo lang og dos puntos sa Game-2. (BANAT NEWS)
- Latest
