Thurman walay problema sa timbang

CEBU, Philippines – Miinsister si Keith Thurman nga wala siya'y problema sa timbang ug gani andam na kaayo siya sa official weigh-in karong adlawa kon bisperas sa giatngan nilang away ni Manny Pacquiao alang sa WBA unified welterweight title.

Sa dihang nahinabi sa ABS-CBN, si Thurman misupla sa mga estorya nga duna siya'y gihambin nga kakulian pagduma sa iyang timbang.

"Never," matud pa ni Thurman. "I told you yesterday my weight is good."

Aron pamatud-an ang iyang punto, ang 30-anyos nga si Thurman miisa sa iyang senina aron ipakita nga solido ug sa nindot kaayong pagkakulit sa iyang abs.

Sila si Thurman ug Pacquiao parehong masaligon nga yano ra nilang makuha ang weight limit nga 147 ka libras sa opisyal nga tinimbangay karong hapon didto sa MGM Grand diin sila magkumbati ugmang adlawa.

Dili hinuon kaayo interesado ang strength coach ni Pacquiao nga si Justin Fortune sa conditioning ni Thurman.