CEBU, Philippines — Taliwala sa mga makapakurat nga pagbalhin sa mga NBA stars sa uban team, si Golden State Warriors star Stephen Curry miingon nga wala siya mabalaka ug andam siya sa laing lisud nga hagit sa sunod NBA season.
Mangandam si Curry sa umaabot nga season uban sa Warriors nga mosuway og bangon human maparot sa NBA Finals batok Toronto Raptors.
Ang kanhi MVP nagkanayon nga dili imposible nga makabalik sila sa finals bisan pa sa kausaban sa ilang koponan tungod sa pagkawala sa pipila ka mga sinaligan niini.
Lakip sa mga key players nga dili na moduwa sa Warriors sunod season naglakip nila ni superstar Kevin Durant ug veterans nga sila si Andre Iguodala ug Shaun Livingston.
Sayod hinuon si Curry nga mag-agi sila og grabeng kalisud tungod kay sa tunga-tungang bahin sa sunod season pa makaduwa og balik ang iyang katimbang nga si Klay Thompson. Nanghinaut si Curry nga makatabang kanila ang ilang bag-ong sakop nga si D'Angelo Russell.