Island Paints naghari sa A+EBA Corporate Cup Season 4

CEBU, Philippines – Si Ralph Catugas mitagak og unom ka tres sa iyang 24 puntos sa dihang gibugha sa Island Paints ang Phoenix Building System, 86-77  aron langkaton ang kampiyonato sa Architects+Engineers Basketball Association (A+EBA) Corporate Cup Season 4 didto sa Cebu Eastern College (CEC) gym.

Lain pang tulo ka players ang mikadlit og double figures alang sa Island Paints  nga kontrolado kaayo ang duwa sukad sila miposte og  11-1 nga labaw sa first period.

Sukad miposte og 25-11 nga bentaha human sa unang kuwarter, kanunay nang miabante og dili momenus 10 puntos ang Island Paints.

Nakasikit man tuod ang Phoenix ngadto na lang sa otso puntos, 49-57, apan gipabuthan sab dayon sila og 18-10 run sa Island Paints hinungdan nga nainat og balik ang ilang labaw ngadto sa 16 puntos, 75-69. Wala na makabawi pa sukad niadtong ang Phoenix.

Si Catugas naka-angkon og igong suporta nilang Chester Hinagdanan, Criz Matunog ug Ryan Fabia nga nagkumbinar og 37 puntos alang sa Island Paints. Sila si Malvin Malicdem ug Rodney Labang  miiskor og 16 puntos matag usa alang sa Phoenix, samtang si Lawrence Gayotin mikolekta og 15 puntos  sa pilderong kawsa.

Sa gubat alang sa ikatulong dapit, si Ayi Armenion mipabuto og 32 puntos, samtang si Justin Aspacio miamot og 22 puntos aron pangulohan ang Filmon/Dormakaba ngadto sa kulbahinam nga daog batok sa Thinking Tools, 55-52.