CEBU, Philippines – Dili na mabangbang, ang Portmen ug Petracorta Customs Brokerage segurado na sud sa semis sa Cebu Aduana Basketball Legends Season 2.
Kini human ang Portmen midaog batok sa Robbie Trading, 111-89 ug ang Petracorta daog sab sa Gonzales Customs Brokerage, 85-78 niadtong Sabado didto sa Basak gym, Cebu City.
Ang Portmen ug Petracorta nagsawo sa ikaduhang dapit sa ilang 5-1 nga baraha sunod sa league-leader Canillas Customs Brokerage nga adunay 6-0 record.
Sila si James Jordan ug Reggie Regidor parehong miantog og 16 puntos sa Portmen, kansang duwa wala gyud molubad sukad miposte og 50-39 sa halftime.
Ang team manager nga si Boode Monteño miambit og 14 puntos, samtang si Shun Cal miamot og 10 puntos.
Nagkumbinar og 52 puntos sila si Jomar Caynila ug Marlou Cañal, apan dili kini paigo aron aswaton ang Robbie Trading kay wala sila makakuha og igong suporta gikan sa ilang teammates.
Si Gilbert Guirit mihipos og 11 puntos sa Robbie Trading ni Karl Zapanta nga nangiwit sa standing sa ilang 1-6 record.
Sa laing bahin, si Toni Largosa miiskor og 17 puntos aron mangu sa balanseng opensa sa Petracorta.
Mihimo sab og kasikas ang team manager niinin si Mayor Melchor Petracorta nga mitikdol og 11 puntos sa nagmadaugon niyang koponan.
Ang Gonzales Customs Brokerage nilang Art Gonzales ug Richard Rongcales nga adunay 3-3 record gipangulohan nilang Jim Villa ug Mondoy Aragon nga nagkumbinar og 37 puntos.
Midaog sab ang Alin Logistics nilang Israel Alin ug Ryan Barral batok sa Jam Customs Brokerage ni Primitivo Mondin sa iskor nga 82-78.
Mibagnos og 29 puntos si Javer Deniega aron mangu sa scoring sa Alin Logistics, gisundan ni Loreto Castillo sa iyang 24 puntos.
Salamat sa 20 puntos nga gidugang nga nakapadaog sa Alin Logistics. Bisan pa sa maong kadaogan, ang Alin wala na'y paglaum pa nga moabante sa semis kay nahimutang sila sa kinailawmang bahin sa standing uban ang 1-6 nga baraha.
Upat ka Jam players ang miiskor og double pinangulohan ni Jovani sa iyang 28 puntos. Ang laing tulo mao sila si Unale Monares, Alfred Jovita ug Entero.
Ang liga giorganisar nilang Janno Boniao, Noel Medalle, Ferdinand Sigue, Sidney Ganapin ug Jun Gayo sa abag ni Roy Canillas isip consultant.
PUNTOS MATAG USA
Unang duwa:
PORTMEN (111) – Jordan 16, Regidor 16, Monteño 14, Cal 10, Villacampa 8, Oyao 6, Caburnay 6, Badon 4, Bacalla 4, Pautan 2.
ROBBIE (89) – Caynila 27, Cañal 25, Guirit 11, Amante 8, Villarias 6, Josaphat 4.
Ikaduhang duwa:
PETRACORTA (85) – Largosa 17, M. Petracorta 11, Mabangue 9, Villaronza 6, Agustinez 6, Nadal 6, Petracorta 6, Palero 5, Villacastin 4, Sagarino 4, Batuto 2, Rys 1.
GONZALES (78) – Villa 19, Aragon 18, Rama 8, Gonzales 6, Gornez 6, Rongcales 5, Robinson 4.
Ikatulong duwa:
ALIN (82) – Deniega 29, Castillo 24, Gulbin 8, Alaan 6, Lambayan 6.
JAM (78) – Jovani 28, Monares 13, Jovita 12, Entero 10, Mondin 7, Diano 2.