CEBU, Philippines — Migawas nga labing paspas sa tagsa-tagsa nila ka dibisyon sa 21K half marathon sila si Prince Joey Lee ug Ruffa Sorongon atol sa IPI Run 2019 kagahapon didto sa Pescadores Road sa Cebu Business Park.
Ang pambato sa Spectrum Runners Club nga si Lee maoy hari sa men's open sa iyang oras nga 1:15:40. Napilde niya ang Kenyan nga si Joseph Mururi kinsa milandig sa ikaduhang dapit sa oras nga 1:18:43. Si Joseph Emia maoy third placer sa oras nga 1:18:45.
Sa pikas bahin, ang beterana na si Sorongon maoy labing paspas sa women's class human niya gitapos ang lumba sud sa usa ka oras, 30 minutos ug 20 segundos. Wa kaapas kaniya sila si Evamie Villarin (1:34:06) ug Lizane Abella (1:35:27) kinsa maoy second ug third placers.
Nakabawi ang mga Kenyan sa 12K human si Eric Chepsiror midaog sa men's title sa oras nga 41:43. Si Florendo Lapiz gasunod sa oras nga 41:53, samtang si Azlan Pagay maoy third sa oras nga 43:20.
Ang teen runner nga si Cherry Andrin maoy midaog sa 12K womens sa oras nga 51:27 gisundan nila ni Angel Estillore (56:39) ug Hazel Conde (57:07) sa ikaduha ug ikatulong dapit.
Sa 6K, midominar sila si Ariel Saballa ug Marielle Estreba sa oras nga 20:45 ug 25:45, samtang sila si Jerome Sayre (10:57) ug Princess Broneo (12:15) maoy misidlak sa 3K.