CEBU, Philippines — Mikadlit og 27 puntos si Larry Oroyan aron pangulohan ang J&J Surplus nga mikudkod sa Kalubi-an, 83-68 sa Consolacion Lilo-an Basketball Association (CLBA) Season 2 niadtong Martes didto sa GT Academy gym sa Lilo-an.
Ang J&J Surplus ni team owner Henry Agbon nakakuha sab og igong suporta gikan ni Romnick dela Rama nga mikamada og 20 puntos. Si Jomar Tiwan mikabya og 16 puntos sa J&J Surplus nga nakapanimaho sa ilang sayong kadaogan human miariya og 41-21 sa halftime.
Nalaslasan hinuon ang maong labaw ngadto na lang sa 12 puntos sa iskor nga 59-47 dihang mi-rally ang Kalubi-an. Apan bisan giunsa nila og gukod wala gyud mosalir ang ilang mga paningkamot kay miarangkada man ang J&J Surplus sa final period hinungdan nga miburot og balik ang labaw.
Mikudkod unta og 35 puntos si Almer Icot, apan wala kini kapahimusli kay nalukapa na man sab ang Kalubi-an.
Si Chary Icot migaling og 12 puntos sa gipung-olan nga Kalubi-an.
Sa laing aksiyon, ang Jonghap Tang-an nimasaker sa Forwarders, 73-60 ubos sa liderato ni Levie Sofia nga miposa og 17 puntos.
Nangu sa Forwarders mao si Teodoro Balansag nga mipabuhagay og 18 puntos, gisundan sa team manager niining si Genesis Pepito nga miamot og 15 puntos.
Midaog sab ang Philcement dihang ilang gipakaging ang Villa Reyna Subd., 76-67.
Gipangulohan nilang Lito Dejarme ug Louise Pepito ang Philcement nga nagkumboya'g 41 puntos, samtang ang team manager nga si Bobong Tiongson miabuno og 14 puntos sa kadaogan sa iyang koponan.
Upat ka players sa Villa Reyna ang miiskor og double figures pinangulohan ni Vince delos Cientos sa iyang 19 puntos. Si Jordan Camajalan mitali og 16 puntos, samtang sila si Chris John Basiga ug Marmar Doblas mitampo'g 14 ug 10 puntos sa maong kapildihan.
Ang liga nga gipaluyohan sa Union Galvasteel ug J&J Surplus, gipadagan ni commissioner Fury Trazona.
Naumol ang liga tungod sa pagtambayayong nilang Arnold Labustro (president) ug Henry Agbon (vice president).
PUNTOS MATAG USA
Unang duwa:
J&J Surplus (83) – Oroyan 27, Dela Rama 20, Tiwan 16, Agbon 8, Casper 8.
KALUBI-AN (68) – Icot 35, Cortes 12, Pepito 7, Cabahug 6, Isok 6.
Ikaduhang duwa:
JONGHAP (73) – Sofia 17, Cabalhug 14, Entrampas 8, Raffe 7, Pitogo 7, Bonghanoy 6, Dungog 2, Abella 2.
FORWARDERS (60) – Balansag 18, G. Pepito 15, Orongan 9, Tamparong 9, Lee Jr. 5, Alcanzar 4.
Ikatulong duwa:
PHILCEMENT (76) – Dejarme 21, L. Pepito 20, Tiongson 14, Retiza 6, Yballe 4, Gaite 3, Gestopa 2.
VILLA Reyna (67) – De los Cientos 19, Camajalan 16, Basiga 14, M. Doblas 10, Gonzaga 9, Doblas 2.