CEBU, Philippines – Andam na ang Dakbayan sa Naga sa ilang pag-host sa duha ka triathlon race, Sun Life 5150 Triathlon Cebu ug Go For Gold Sunrise Sprint karong Domingo didto sa Naga Boardwalk.
Pulos gipasiugdahan sa Sunrise Events, Inc., ang Sun Life usa ka olympic-distance nga lumba nga langkoban og 1.5K swim, 40K bike ug 10K run, samtang ang Sunrise Sprint mas mubo kini nga rota nga dunay 750m, 20K bike ug 5K run.
Kapin sa 300 ka local ug international athletes ang mosalmot sa lumba.
Si Princess Galura, SEI general manager, nagkanayon nga ang lumba magsilbe nga preparasyon sa mga elite athletes alang sa Ironman ning tuiga.
Ganting $10,000 ang madawat sa mga kampiyon sa pro division.