CEBU, Philippines – Ang Cebu City Sharks nagbangis pagsugod, apan kalit lang misaliring hinungdan nga napilde sila sa Davao Occidental Tigers, 67-82 sa Game-1 sa ilang 'best-of-three' quarterfinals sa Maharlika Pilipinas Basketball League (MPBL) Datu Cup niadtong Huwebes sa didto sa Rizal Memorial Coliseum sa Davao City.
Bisan og miduwa sa teritoryo sa ilang kontra ug wala ang alas nilang si Patrick Cabahug nga na-injured, maayong labok ang gipakita sa Sharks hinungdan nga miabante kini og 10 puntos, 24-14 sa tunga-tungang bahin sa ikaduhang kuwarter.
Apan ang Tigers mibawos pinaagi sa 20-5 rally ug nailog ang labaw sa halftime, 34-29.
Wala na molingi pa sukad niadto ang Tigers nga mipaburot pa gani sa ilang labaw ngadto na sa 17 puntos, 73-57 sa nahibilin nga 4:03 sa duwa.
Si Mark Yee maoy nangu sa Tigers uban ang 20 puntos, samtang si Rhaffy Octobre mao sab ang nangu sa Sharks sa iyang 16 puntos.
Ang Sharks nagtinguha nga makaangkon og laing kinabuhi sa Game-2 karong alas-7 sa gabii didto sa Lagao gymnasium sa General Santos City.