Team Bombie kampiyon sa MIBA Season 1
CEBU, Philippines — Natuman gyud ang pangandoy sa Team Bombie nga makampiyon dihang ilang gipilde ang Team Argie, 97-90 sa finals sa Minglanilla Basketball Association (MIBA) First Conference niadtong Sabado didto sa Minglanilla Sports Complex.
Si Eric Ortega maoy nangu sa unom ka Bombie players nga miiskor og double figures pinaagi sa iyang 22 puntos.
Sulagma kaayo kay sa matag kuwarter, ang Bombie moiskor og 24 puntos, samtang 22 puntos ang matala sa Argie.
Labaw lang og dos puntos ang Bombie paghuman sa unang kuwarter. Nahuman ang first half sa iskor nga 48-44 pabor sa Bombie.
Gamay ra man tuod ang labaw sa Bombie, apan ila kining namintinar hangtod napupos ang oras.
Sa laing bahin, ligas sab kaayo ang duwa alang sa ikatulong puwesto diin igo lang midaog usa ka punto ang Team McKoy batok sa Team Titing sa iskor nga 93-92.
Kining maong liga nahimo ug nagmalampuson tungod sa mga paningkamot sa MIBA officials ubos sa liderato sa presidente niining si Alex Sandal.
Lain pang mga opisyales sa MIBA mao sila si Boboy Taran (vice president-internal), Rico Puerto (vice president-external), Eduard Alesna (secretary), Titing Arnan (treasurer), Ericson Trazona (auditor), Mark Villarta (PRO), Eric Ortega, Else Reserva ug Jun Rafayla (sgt. at arms).
Ang MIBA advisers naglakip nilang Mayor Elanito 'Lane' Peña, Vice Mayor Robert John 'Jojo' Selma ug Cording Mejias.
Ang mga duwa gipadagan CEBRA ubos sa pagpangu ni CESAFI head referee Edwin Dejacto Sr. sa abag nilang Peter Lalican, Tedy Cabanada ug Franklin Cabellon.
Sa laing bahin, ang MIBA Second Conference gikatakda nga sugdan karong Marso 31 diha sa Minglanilla Sports Complex.
Puntos Matag Usa
Unang duwa:
Team MCKOY (93) – Selma 24, Duterte 21, Laguna 19, Aguirre 15, Dobleres 14.
Team TITING (92) – Atanacio 31, Itao 13, Guinggona 10, Vimoviza 8, Apalicio 8, Arnan 6, Muna 4, Talaroc 4, Gabaca 2, Sandal 2.
Ikaduhang duwa:
Team BOMBIE (97) – Ortega 22, Sellote 20, Cederiosa 14, Canares 12, Taran 11, Abellanosa 11, Abastillas 3, Villareza 2, Sillote 2.
Team ARGIE (90) – Trazona 22, Seriano 17, Gerasmeo 12, Rafayla 9, Obeso 9, Dela Calzada 6, Longakit 5, Ricaplaza 4, Sillote 4, Jaguar 2. (BANAT NEWS)
- Latest
