Talisay nagpanikad na

CEBU, Philippines – Lab-as pang naghudyaka sa ilang kalampusan sa Gullas Legacy Cup, ang Talisay Aquastars mag-atubang sab dayon og mas lisud nga hagit ug kini mao ang pagdepensa sa ilang trono sa Governor's Cup nga sugdan sunod bulan.

Duha ka semana ang milabay, ang Aquastars milangkat sa korona  sa Samsam Gullas Cup 3.0 Cebu 1st District Inter-Cities and Municipalities Developmental Basketball Tournament nga walay pilde sa walo ka duwa.

Ilang gitak-op ang ilang dominasyon pinaagi sa paglubong sa Carcar Lechoneros og 23 puntos matag duwa sa ilang 'best-of-three' finals series.

Tungod niini, gidayeg ni Talisay coach Rey Michael Guerra ang iyang  players ilabi na sa gipakita nilang kadasig ug determinasyon nga modaog nga naghatag kanila og P80,000 nga ganti. 

"Sa akong mga players sa Team Talisay Aquastars, keep up the good work especially sa inyong maayong attitude on and off the court ug sa inyong will to win. Inyo gyud na-prove na teamwork will prevail in every game. Very coachable and I'm proud of it," matud pa ni Gurrea, kanhi batos sa USJ-R Jaguars sa iyang panahon niadtong dekada '80 sa dihang ang CESAFI nailhan pa nga CAAA.

Apan ang Aquastars wa'y panahon aron inaton ang ilang pagmaya kay sayod sila sa dakong misyon nga nag-atang kanila sa Cebu Governor's Cup nga gikatakdang sugdan karong Marso 9.

Si Gurrea nagkanayon nga moparada sila og susamang line-up nga miharos og daog sa tanan nilang mga duwa sa Legacy Cup.

Gipangulohan nilang regular season Most Valuable Player Jay Deiparine ug Finals MVP Raffy Bacasmas, ang Talisay makasandig sab nilang Clyde Keaton Taburnal, John Elmer Villabrille, Michael Tabay Jr. ug Ronan Briones.

Molig-on pa hinuon ang Aquastars sa Governor's Cup sa pagbalik ni Kendrick Abarquez nga maoy mohulip sa papel ni Elmer Echavez, ang Gov's Cup MVP sa miaging tuig nga dili na mahimong makaduwa kay usa na ka college varsity.