Kasaysayan laraw sa Sisters of Mary

CEBU, Philippines – Gikan sa usa ka simple nga kadaugan sa usa ka regional 3x3 tournament sa miaging tuig, ang Sisters of Mary School-Boystown ug Girlstown may kahigayunan karon nga ibutang ang Cebu sa mapa sa kalibutan sa basketbol sa ilang pag-host sa Chooks to Go SBP 3X3 Basketball Tournament karong Sabado ug Domingo.

Gawas sa ilang misyon nga pagbuak sa record sa labing daghan nga bata nga dungan nga nagduwa og 3x3 basketball, si coach Van Halen Parmis, usa sa mga utok sa maong event, miingon nga gusto usab nila nga kini ang pagsugod sa ilang kampaniya sa pagpakatap sa maong sport nga usa na ka regular sport sa Olympics.

"We are happy that our kids are chosen to be part of this big event. We thank the support especially from Chooks to Go, SBP and Cebu Province," matud pa ni Parmis sa press conference kagahapon didto sa  Cebu Provincial Capitol Social Hall.

Ang SMS Boystown mikawat og atensyon sa miaging tuig rasun nga sila ang napili nga mo-host. Kini human nila gipakuratan ang  Sacred Heart School-Ateneo de Cebu sa Central Visayas finals sa  SBP Under 18 Pambansang Tatluhan niadtong Septiyembre.

Kasaysayan ang nagpaabot sa Sisters of Mary tungod kay libuan ka mga batang players ang dungan nga musalmot sa maong torneyo. Adunay kapin 1,100 players nga gibahin sa 277 teams ang moduwa sa boys, samtang 1,588 nga gibahin sa 397 sa girls. Moabot ngadto sa 952 games ang duwaon sa maong event.

Si Cebu Provincial Sports Commission (CPSC) Executive Director Atty. Ramil Abing miingon nga naghinam-hinam sila sa maong event ilabi na nga alang kini sa kaayohan sa mga kabatan-onan."With the magnitude of this event, we promise to provide support for them. This activity will put Cebu in the spotlight of the basketball world."

Si Bounty Agro Ventures, Inc. executive Alfred Espina misaad og grabeng suporta sa maong kalihokan nga nakita nila nga makahatag og dakung tabang sa sport ug sa mga kabatan-onan. "We are backing up all activities from Samahang Basketbol ng Pilipinas because we knew that this is for the youth. This is not an ordinary event and this will lead us into international recognition," matud pa niya.

Sa laing bahin, gipahibalo sa mga organizers nga mutambong sa event ang duha ka rising amateur cagers nga sila si Thirdy Ravena sa Ateneo Blue Eagles ug Kobe Paras sa University of the Philippines Maroons.