CEBU, Philippines — Usa ka adlaw human siya mirehistro og season-high 35 points, ang Boston Celtics All-Star nga si Gordon Hayward mipakita na sab sa iyang talagsaong abilidad human niya gitabangan ang koponan ngadto sa 114-93 nga kadaogan batok sa Dallas Mavericks sa NBA kagahapon didto sa Boston.
Hinay-hinay na nga mibalik ang ka maayong laki ni Hayward karon nga season timaan usab nga nakarekober na siya sa iyang gidangatan nga injury sa miaging season diin nabali iyang tiil.
Si Hayward miiskor og 16 puntos uban ang 11 ka rebounds ug walo ka assists.
Balanse nga opensa ang gipakita sa Celtics human miiskor og 21 puntos si Jaylen Brown, samtang sila si Jayson Tatum ug Al Horford adunay 18 ug 10 puntos matag usa.
Ang Celtics midaog bisan pa og wala ilang sinaligang point guard nga si Kyrie Irving nga gipapahuway kay natuslokan ang mata niini atol sa ilang duwa batok Minnesota Timberwolves.
Ang star rookie nga si Luka Doncic maoy leading scorer sa Mavs sa iyang 19 puntos, samtang ang veteran nga si Dirk Nowitzki gisugat og abiba sa mga fans sa Celtics isip respeto sa iyang legasiya sa NBA. Mitapos siya sa duwa nga adunay duha ka rebounds.
Samtang didto sa Madison Square Garden, ang New York Knicks milampurnas sa Los Angeles Lakers sa iskor nga 119-112. Sa ubang mga resulta, ang Indiana Pacers nakaipsot sa Chicago Bulls, 119-116, ang Utah Jazz milubong sa Cleveland Cavaliers, 117-91.
Midaog sab ang Miami Heat batok sa Washington Wizards, 115-109, ang Oklahoma City Thunder mipakugang sa Portland Trail Blazers, 111-109 ug ang Los Angeles Clippers mipukan sa Phoenix Suns, 121-111.